Бу хакта Татарстан мәшгульлек үзәге матбугат хезмәте хәбәр итә.

«Ел башыннан республика мәшгульлек үзәгенә эш эзләүдә ярдәм сорап 3,6 мең кеше мөрәҗәгать иткән. 1 343 кеше, ягъни мөрәҗәгать итүчеләрнең 37 проценты, эшкә урнаштырылган. Март башында 3 716 кеше рәсми рәвештә эшсез статусына ия булган. Теркәлгән эшсезлек дәрәҗәсе – 0,18 процент», — дип сөйләделәр матбугат хезмәтендә.

Төбәктә эшчеләргә ихтыяҗ тотрыклы рәвештә югары булып кала. «Россиядә эш» бердәм цифрлы платформасында 52,4 мең вакансия урнаштырылган. Һәр эшсез кешегә 14 эш урыны туры килә.

Кадрлар кытлыгы бигрәк тә төзелеш өлкәсендә сизелә. Республикадагы барлык вакансияләрнең 59 проценты әлеге тармакка туры килә. Аннан соң иң күп буш эш урыннары сәнәгать өлкәсендә күзәтелә (16 процент). Өчлеккә шулай ук мәгариф һәм фән өлкәсе керә (6 процент). Вакансияләрнең 4әр проценты сәламәтлек саклау һәм социаль хезмәт күрсәтү өлкәсендә, 3 проценты транспорт өлкәсендә тәкъдим ителә, дип яза Татар-информ.

Сүз уңаеннан, хәзерге вакытта Татарстанда “Кадрлар” илкүләм проекты гамәлгә ашырыла.